Amplio informashon tokante seguro básiko di malesa
E instanshanan i personanan, ku a duna oido na e invitashon di Minister di Salubridat Públiko, Medio Ambiente i Naturalesa, pa asistí na algun seshon di informashon tokante di Seguro Básiko di Malesa (Seguro Básiko), a risibí informashon ekstenso tokante e tema aki. Durante di e seshonnan di informashon ekspertonan presente a duna informashon ekstenso i balioso tokante di e konsepto di lei di Seguro Básiko i e pakete di kuido ku pueblo lo por gosa di dje unabes esaki keda introdusí.
Tur esnan ku a asistí a hasi bon uzo di e oportunidat pa hasi pregunta i duna komentario. Ekspertonan ku tabata presente a duna splikashon i aklarashon riba nan pregunta i inkietutnan.
Manera ta konosí Gobièrnu di Kòrsou ta preparando pa introdusí un Seguro Básiko di Malesa. E Seguro Básiko ta un lei ku ta sòru pa e pueblo por tin e mínimo ku un pueblo mester na kuido pa por mantené su salú. E lei di Seguro Básiko di Malesa ta duna tur suidadano igualdat, uniformidat i solidaridat ku ta e úniko forma pa garantisá ku e kuido lo ta di kalidat, aksesibel i pagabel pa un i tur ku ta biba legal riba nos pais Kòrsou.
Ku introdushon di e Seguro Básiko, seguro (nan) privá tambe mester ofresé nan grupo di asegurado e mesun Seguro Básiko i pakete di kuido ku Gobièrnu ta ofresé. Si e seguro privá no por bendé i/ òf ofresé e Seguro Básiko i pakete igual na loke Gobièrnu ta ofresé, e asegurado privá mester wòrdu sigurá via Gobièrnu pa evitá ku nan ta ekskluí hende di sierto malesa.
E informashon a keda duná na diferente oudiensianan spesífiko manera gruponan den representashon di penshonadonan, empleadonan públiko i públiko general. Algun di e ekspertonan ku a presentá i a sinta den e diferente pènelnan tabata entre otro Presidente di Taskforce di Salubridat dr. Yves Schoop, señor Guillermo Anthony kende tambe ta forma parti di e Taskforce, hurista di Ministerio di GMN señora Vanessa Eliza, lider di proyekto Seguro Básiko señor Hans de Haan i lider di e proyekto pa redukshon di remedi señora Lisette Cova. Na un forma simpel pero ku bista riba e nesesidat di e grupo spesífiko a duna informashon durante di e diferente seshonnan.
Interesante sigur tabata e informashon tokante di e pakete amplio ku e Seguro Básiko ta kubri. E Seguro Básiko lo kubri:
• Kuido médiko, esta dòkter di kas, speshalista (ku eksepshon di sirugia plástiko, laboratorio i sikólogo)
• Kuido Paramédiko bou di kua fisioterapia, logopedista, ergoterapia, podoterapia, dietista, parto i kuido despues di parto i Kuido den hospital òf klínika pa tratamentu médiko speshalisá (inkluso revalidashon sikiátriko), kuido na kas, prótesis i ekipo di yudansa den kuido, transporte ku ambulans, den kaso ku mester di kuido debí ku bida ta na peliger i kua no por keda duná rápido por keda mandá pa eksterior, remedi i brel.
• Kuido dental: Pa esnan te ku 18 aña: konsulta, diagnostiká, prevenshon, higiena, sirugia, prótesis di akuerdo ku e areglo aktual di BZV i esnan riba 18 aña ta risibí únikamente prótesis.
• Prevenshon relatá na kuido pa evitá komplikashon, diabétis, problema di kurason i bena, obesitas i Asma/ COPD.
• Prevenshon selektivo ora ku investigashon individual i intervenshon ta sigui, kuido serka dòkter di kas, esta angua kontra grip, skrìn di pechu i skrìn di cervix riba indikashon.
E seshon di informashon “InformáMi,” tokante Seguro Básiko, ta forma parti di un esfuerso mas grandi di Minister Scoop- Constancia pa informá komunidat di e kambionan den nos sistema di Salubridat Públiko. Próksimamente lo sigui duna mas informashon den medionan di komunikashon riba Seguro Básiko i otro tópikonan den kuadro di reformanan den nos salubridat.
Willemstad, 24 yüli 2012
